కాగితాల బరువు” (Paper Weight)

“కాగితాల బరువు” (Paper Weight)

రచన : డా. ఆచార్య ఫణీంద్ర

కాగితాల బరువు” గా పిలుతురు నన్ను!
“పేపరు వెయి” టనిరి బ్రిటిషు వారు!
ఆంగ్ల పాలనమున “ఆఫీసు” లందున
కానిపించినాను నేను తొలుత!

అచ్చు బోసి గాజు నందాల ముద్దగా,
అందు పూల సొగసు నమర జేసి,
ముద్దు రూపు నిడిన – మురిసిపోదును నేను!
పిదప, బానిసగుదు! వెతయె మిగులు!!

కాగితంబుల పైన గట్టిగా కూర్చుండి
ఎగిరి పోకుండగా నెపుడు జూతు!
ఆ “ఫైలు”, నీ “ఫైలు” నటు నిటు జరుపగా –
అటులె నేనును నాట్య మాడుచుందు!
విశ్రాంతి వేళలో వేడుక నధికారి
కరములో “గిరగిరా” తిరుగుచుందు!
వ్యాయామమును గూర్ప అధికారి చేతికి –
పిసుకబడుచునుందు పిడికిలందు!

“బాసు” దూషింప – అధికారి పట్టరాని
కోప మెల్ల మది నణచుకొనుచు వచ్చి,
“అత్త మీది కోపము దుత్త కన్న” యట్లు –
నన్ను దీసి నేలకు గొట్ట – నలిగిపోదు!

ఇన్నిటిని భరింప, నిసుమంత విలువైన
ఈయ బోరు నాకు నెప్పుడేని!
ముద్దు గారు ముఖము మూతి ముక్కు పగిలి
యున్నను, పడవేసి యుంతు రటులె!

టేబులు పైన పేపరు పఠింతురు! “ఫైలు”న దాచుకొందురే!
టేబులు పైన నున్న నను టెక్కును జూపుచు, గాన రెప్పుడున్!
టేబులు పైన పేప రొకటిన్ గొన, నన్నటు త్రోసి వేతురే!
టేబులు పైన పేపరుల ” డిగ్నిటి” సైతము నాకు లేదయో!

స్వాతంత్ర్యము వచ్చె నెపుడొ –
ఈ తర “మాఫీసు” లందు నెన్నియొ మారెన్!
స్వాతంత్ర్యమె కాదు గదా,
భూతలమున నాకు సానుభూతియు కరువే!

“హృదయమే గాజు వంటిది – పదిల” మనుచు
నిత్యమును జెప్పు మనుజుండు నీతులెన్నొ!
దేహమే గాజుదైన నా దీన గతిని
కానబోడు! వాని హృదియె కరకు రాయి! #

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు /  మార్చు )

గూగుల్ చిత్రం

You are commenting using your Google account. నిష్క్రమించు /  మార్చు )

ట్విటర్ చిత్రం

You are commenting using your Twitter account. నిష్క్రమించు /  మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు /  మార్చు )

Connecting to %s

స్పామును తగ్గించడానికి ఈ సైటు అకిస్మెట్‌ను వాడుతుంది. మీ వ్యాఖ్యల డేటా ఎలా ప్రాసెస్ చేయబడుతుందో తెలుసుకోండి.

%d bloggers like this: