హిమ నగరి

హిమ నగరి

రచన: ‘ పద్య కళా ప్రవీణ ‘ డా. ఆచార్య ఫణీంద్ర

( మాస్కో నగరాన్ని సందర్శించినపుడు …

ఆ నగరంపై వ్రాసిన పద్య కవిత – )


హిమ సమూహము లిట, ఎచ్చోట కాంచినన్!

చెట్టు మీద – కొట్టు మెట్టు మీద –

మార్గమందు – పెద్ద మైదానములయందు –

చెప్పు క్రింద – ఇంటి కప్పు మీద –


ఎవ్వడొ నేల ’ బ్రెడ్డు ’ పయి ఇంపుగ వెన్నను పూసినట్టులన్ –

ఎవ్వడొ పాల మీగడల ఈ భువి నెల్లెడ ఒల్కినట్టులన్ –

ఎవ్వడొ మాయతో ఇసుక నెల్లయు మంచుగ మార్చినట్టులన్ –

ఇవ్విధి ఉల్లమందు తలపించును కాంచగ ’ మాస్కొ ’ వీధులన్!


నిశ సమయంబున నిచ్చట

శశి అవనిని హిమము గాంచి సందేహించున్ –

” దిశ మారిచి ఏ రీతిని

విశు డవనిని నిలిపె నాదు వెన్నెల? ” లనుచున్!


మంచు వాన కురియ మహినెల్ల నిండుగా

చెట్టు కొమ్మల పయి చేరి హిమము;

కానిపించినంత కలిగించు విభ్రాంతి –

మదికి తోచి ’ క్రిస్సుమస్సు చెట్టు ’!


బాల్య చాపల్య మది యేమొ వాడ దింక!

కనుల ముందున్న హిమ మెల్ల కనుల ముందె

మధురమైన ’ ఐస్క్రీము ’ గా మారు నెడల –

ఎంత బాగుండు ననిపించు వింతగాను!


సూర్య కాంతి భువిని సోకకుండక మున్నె

ఇచ్చట ఉదయించు నెవడొ వీడు?

మార్గములను నిండు మంచు ముద్దల నెల్ల

తొలగజేయు – బాట వెలుగ జేయు!


దారిని తొలగించు హిమము

దారికి అటు నిటును వేయ – ధవళాద్రు లటున్

పేరుకొన – దారి కననగు

నారి కుచంబుల పయి గల నల్లని పయిటై!


తెలుగు దేశమునందు వాకిలి తీసి, ఊడ్చియు ముగ్గిడున్

తెలుగు నాతి శుభోదయంబున తెల్గు సంస్కృతి చాటగాన్!

తెలిసె నిచ్చట – రష్య పూరుష ధీమణీంద్రులు వాకిలిన్

తొలగ జేయుచునుంద్రు మంచును తూర్పులో తెలవారినన్!

( తరళ వృత్తము )


కనిపించును తెల్లదనము

మనుజుల హృదయముల – నగర మార్గంబులలో!

అనుభవమగు చల్లదనము

మనుజుల ప్రేమాదరముల – మరియు ప్రకృతిలో!


— *** —

ప్రకటనలు

4 వ్యాఖ్యలు (+add yours?)

  1. Trackback: హిమ నగరి | indiarrs.net Featured blogs from INDIA.
  2. padmarpita
    మే 28, 2010 @ 13:27:30

    మాంచి ఎండల్లో మంచు పోస్ట్:):) బాగుందండి.

    స్పందించండి

  3. కంది శంకరయ్య
    మే 28, 2010 @ 13:54:39

    ఫణీంద్ర గారూ, మధురపద్యాల ‘ ఐస్క్రీములను ‘ రుచిచూపించారు. ధన్యవాదాలు.

    స్పందించండి

  4. Dr.Acharya Phaneendra
    మే 28, 2010 @ 21:25:54

    indiarrs.net నిర్వాహకులకు,
    పద్మార్పిత గారికి,
    కంది శంకరయ్య గారికి
    ధన్యవాదాలు.

    స్పందించండి

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు / మార్చు )

ట్విటర్ చిత్రం

You are commenting using your Twitter account. నిష్క్రమించు / మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు / మార్చు )

గూగుల్+ చిత్రం

You are commenting using your Google+ account. నిష్క్రమించు / మార్చు )

Connecting to %s

%d bloggers like this: