ఒక్కటై బ్రతకాలంటూ… (విరహ గీతం)

11 Feb 2012 అభిప్రాయములు

by Dr.Acharya Phaneendra in తెలుగు సాహిత్యం

ఒక్కటై బ్రతకాలంటూ…

(విరహ గీతం)

 రచన : డా. ఆచార్య ఫణీంద్ర 

ఒక్కటై బ్రతకాలంటూ …

ఒక్కటై బ్రతకాలంటూ 

ఒట్టు తీసుకొన్నాను -

ఒక్కటే మరిచాను -

గుర్తు పెట్టుకొమ్మనడం!

చిట్టచివరి దాక దానిని

గుర్తు పెట్టుకొమ్మనడం!                                        || ఒక్కటై  ||

నీ ఆశకు నేను శ్వాస కావాలని -

నా ఊసుకు నీవు భాష కావాలని -

మన ఇరువురి మనసు లొక్క టని

మాట తీసుకొన్నాను -

ఒక్కటే మరిచాను -

గుర్తు పెట్టుకొమ్మనడం!

చిట్టచివరి దాక దానిని

గుర్తు పెట్టుకొమ్మనడం!                                        || ఒక్కటై  ||

కాలాలు మారినా, కరిగి పోనిదై -

స్థానాలు వేరైనా, చెరగి పోనిదై -

వాడిపోని ప్రేమ మనదని 

బాస చేసుకొన్నాము -

ఒక్కటే మరిచాను -

గుర్తు పెట్టుకొమ్మనడం!

చిట్టచివరి దాక దానిని

గుర్తు పెట్టుకొమ్మనడం!                                        || ఒక్కటై  ||

ధనం ముందు ప్రేమ 

దాసోహమని అందా?

అంతస్తుల ఆరాటంలో 

ఆత్మ చంపుకొందా?

నయ వంచన జీవితానికి 

నటనలే నేర్పిందా? 

రంగుటద్దాల కోసం   

రత్న దీప మార్పిందా?                                       || ఒక్కటై  ||   

— ***—