షష్టి పూర్తి శంస

09 Feb 2012 అభిప్రాయములు

by Dr.Acharya Phaneendra in తెలుగు సాహిత్యం

రిటైర్డ్ ఐ.ఎ.ఎస్ ఆఫీసర్, తిరుమల తిరుపతి దేవస్థానం పూర్వ ‘కార్య నిర్వహణాధికారి’ డా. కె.వి. రమణాచారి గారి ‘షష్టి పూర్తి’ మహోత్సవం నిన్న(8 ఫిబ్రవరి 2012) హైదరాబాదులోని ‘రవీంద్ర భారతి’లో వైభవోపేతంగా, నేత్ర పర్వంగా జరిగింది. ఈ సందర్భంగా ‘కృష్ణా పత్రిక’ దిన పత్రిక వారు ఒక ప్రత్యేక అభినందన సంచికను వెలువరించారు. అందులో రమణాచారి గారిపై నేను రచించిన పద్యాలు ప్రచురించబడ్డాయి. బ్లాగు మిత్రులకు ఆ పద్యాలను అందిస్తున్నాను.

షష్టి పూర్తి శంస

రచన: ‘పద్య కళా ప్రవీణ’  డా. ఆచార్య ఫణీంద్ర

ధీరోదాత్తు, డుదార చిత్తుడు, స్ఫురద్దివ్య స్వరూపుండు, గం

భీరాంభోనిధి సార తుల్య కవితా విజ్ఞాన సంపన్నుడున్,

పేరుంబొందిన దక్ష పాలకుడు, సద్విద్వత్సభా బంధుడున్, 

‘కారంచేటి’ కులాన్వయుండు ‘రమణా’ఖ్యా భూషితుం డీతడే!   …1

అల ‘పాత బస్తి’ ప్రజలకు

వెలుగిడ కృషి జేసి, బహుళ విఖ్యాతి గొనెన్

‘కులి కుతుబు సంస్థ’ పతియై! 

‘మలికిభ రాము’ డన నతడె మా తరమందున్!   …2

ఖాదీ, గ్రామోద్యోగము,

శ్రీ దేవాదాయ మింక, గృహ నిర్మాణం,

బాదిగ పలు శాఖలలో 

ఏదైన – నత డభివృద్ధి  నెంతయొ సలిపెన్!   …3

సాహిత్య సాంస్కృతిక సభ

“లోహో!” యని ప్రజలు మెచ్చ నొనరించుటకై

తా హితవరిగ నిలిచి యుం 

డాహా! ఈనాటి ‘రాయ’ లతడే గాదే!   …4

తిరుమల వేంకటేశ్వరుని దివ్య పదాంబుజ సన్నిధానమం 

దరిగి ప్రభుత్వ పాలకుడునై విలువల్ పునరుద్ధరించి, ఆ 

పరమ పవిత్రతన్ నిలిపె భక్తిని సార్థక వైష్ణవుండునై!

‘అరువది ప్రాయ’మం దిక శ్రియఃపతి యాతని మెచ్చి గాచుతన్!   …5         

               —***—